Panduan Pangkataion Raja Parhata Ulaon adat Batak Toba

Panduan Pangkataion Raja parhata Parsinabul Bagian  II

Sahat ma tu Parsinabul (Raja parhata)

KET :  (RPB: Raja parhata Boru  ; RPA:Raja parhata paranak)

RPB:   “Onpe dihita namarhaha maranggi pomparan ni ompunta raja……(.Margana)

Suang songoni boru/bere, dongan sahuta nang ale-ale, raja naginokkon. Asa tamulai pangkataion, tapadenggan ma parhundulta . “suang songoni ma dihamu raja nihula-hula nahuparsangapi hami, raja sipanggompar sipanggabe di hami, mulai sian bona ni ari sahat tu hula-hula anak manjae, Rajanami; raja bolon,ala naeng mulaan nami nama pangkataion rap dohot pamoruon nami, sonang ma hamu rajanami diinganan naung huparade hami,

Hata ni situa tua namandok:

Molo boltok inna eme, russang ma angka dauba,

Molo marulaon gelleng, manuturi ma raja ni hula-hula

Alani pos do rohanami, diangka panuturion muna, mauliate ma.

Diadophon ma muse tu pamoruon,

Nuaneng pe amang boru, nungnga rade hami, asa tamulai pangkataion, dipasahat partingkian tuhamu.

RPA:   Gabe ma jala horas rajanami, mangido hami partingkian asa jolo pasada tahi hami dianggka namarhaha maranggi,

RPB:   Ulahon hamu ma amang boru !!

Dung masiarisan namanrhaha-maranggi  laho manontuhon parsinabul (rajapangalusi) catatan : Pangkataion dos do songon pangkataion nadiginjang ima namanontuhon parsinabul ni Parboru.

RPA:   ‘Nuaeng pe rajanamji taududi ma pangkataion nungnga rade hami raja ni pamoruon muna,

RPB:   Dihamu rajani pamoruon nami Marga ……

          Poda ni ompunta sijolo-jolo tubu namandok:

I.             Artia do inna bona ni ari,

Samisara bona ni bulan,

Asa raja, hita namangkatai,

Pasahat hamu ma jolo pinggan panungkunan,

          II        Ulido inna tano palopi,

                   Ummulian tano hatoguan,

                   Asa sude hita siuli nipi,

                   Pasahat hamu ma pinggan panungkunan,

RPA:   Gabe ma jala horas rajanami, hata ni situa tua namandok:

          Baris baris ni Gaja ,dirura pangaloan, Molo maminta raja denggan ma tutu oloan

          Molo so nioloan, atik beha iba agoan Molo dung dioloan, tamba ma tutu parbinotoan.

         

Nuaeng pe rajanami pasahaton nami ma pinggan panungkunan

(disuru ma boruna parlopes pasahathon tu parsinabul ni parboru.

RPB:   Nuaeng pe amang boru nungnga tangkas hujalo hami pinggan panungkunan, pinggan pasu. Hatahonon nami ma songon parhitean ni tangiang , pamintaan ni angka pasu-pasu, dipogu ni alaman ditonga ni mangajana,

“Adong  dibagas na parbue ni hau siribur-ribur, santi madingin santi matogu

 Asa rindang ma hita dianak rindang dohot diboru,

 Jala torop maribur, nang  diangk pahompu, Songani napuran tiar sirara hadop, sibulung rata,  Asa tiarma dalan tujulu, tiar nang dalan tu jae,

Ulaonta dibagasan sadarion Pasu-passuon ni amanta namartua Debata,

Singkop muse dibagasna ringgit sitio suara, rupiah nabolak, ringgit na marmata, sipalas rohani amanta raja,  suang songoni inanta soripada,

Asa songon tangiang namarunung-unung ,sarune na marhata hata, marpangidoan tu amanta raja tarlubobi tu amant Debata,

Asa sahat-sahat ni solu ma inna amang boru, sahat dirondang ni bulan tula,

Nungnga sahat tuhami pinggan panungkunan,

asa leleng mahita mangolu , jala sahat ma hita tu nasaur matua.

Andoraan so hupaulak hami on tu amang boru, jumolo ma hubuat hami nadihami, (laos dibuat ma sian ringgit I  biasana 3 lembar dipasahat ma tu hasomalanna.)

RPB:   Amang boru ;

 “ Dolok pangururan inna hatubuan ni si marharhalosi,

Nungnga hujalo hami pinggan panungkunan,

paulahon nami ma aon gabe pinggan pangalusi.

RPA:   Gabe ma jala horas rajanami, nga sahat be tuhami pinggan pangalusi ,

mauliate ma

RPB:   Nuaeng pe amang boru tauduti ma pangkataionta; “ Mauliate ma di Tuhanta, mauliate ma nang di hita saluhutna, dibagasan hahipason do hamu amang boru/namboru , rap dohot uduran muna, Rohamu sian huta muna marhire-hire ombun, maronding-onding dolok mandapothon hami tu…………mamboan sipanganon natabo. Nungnga butong hami mangan indahan las , sagak marlompan juhut, dohot minim aek sitio-tio,

         

Godang inna sibutong-butong,otik si pir ni tondi,

Pamurnas mai tu daging, saudara mai tubohi,

Sipaulak hosa loja, sipaneang holo-holi,

Diape natasangkapi sai manumpak ma Debata mula jadi,

Asa  borta namarhalto ma inna, naniagatan titonga-tonga ni robean,

Horas ma hami angka namanganthon ,

martamaba ma dihamu singkat ni namangalean

Raja do inna urat ni uhum, indahan do urat ni hosa,

Sise do mula ni uhum , asa sungkun do mula ni hata

Asa namanungkun ma hami amang boru disintuhu ni indahan masak, naung ta hasagathon i.

Diama nangkatna, dia ma unokna,

Dia ma amang boru hatana, jala dia ma nidikna ?

Note:- Marhire-hire ombun, maronding-onding dolok lapatanna pardalanan nasian huta  nadao

Borta namarhalto= Dumenggan do dohonon sian bagot na marhalto

RPA:   Gabe ma jala horas rajanami, andorang so hualusi hami sungkun-sungkun ni rajai, jumolo ma hupasahat hami huhuasi ni sipanganoni. Molo tung songoni pe rajanami naboi tarpasahat hami, pasangaphon hamu hula-hula nami , tung las ma rohamuna rajanami, sai manumpak ma topndimuna marhite-hite tangiang muna, ditambai Tuhanta ma dihami passamotan dohot hinadongan, asa sai adong bahenon nami laho pasangaphon hamu hula-hula nami,

          “dinamanungkun ma rajai disintuhu ni indahan masak;, ‘Panggabean parhorasan do nidokna rajanami,!’

          Botima,

RPB:   gabe ma jala horas amang boru, “mansai las roha nami di barita panggabean parhorasan nabinoan muna tu hutanami on, Nang ditangiang nami pe antong tu amanta Debata, sai ditambai ma dihamu hahipason, dohot las ni roha, suang songoni, nang sinadongan asa lam marsangap hami, hula-hula muna jala martua hamu nang boru nami. Alai amang boru mardangka do bulung sihupi, margota  bulung ni  demban

          Marangkup do nauli, mardongan do nadenggan,

          Marangkup do inna songon na hundul, mardongan songon na mardalan, siangkup ni panggabean parhorasan nahinatahon muna ido amang boru nahupatangkkas hami,

          Asa tangkas ma inna purba, tangkas nidok ni angkola,

          Asa tangkas hamu maduma,jala tangkas nang mamora ,  ia sungkun sungkun nami hula- hula muna tung tangkas ma amang boru paboa !!

RPA:   Gabe ma jala horas  rajanami,! “Marangkup do tutu nauli mardongan do nadenggan, masiangkup ma tutu songan na hundul, masidongan songin na mardalan.

 Asa tangkas ma inna Purba, tangkas ma nang angkola,

Asa tangkas tutu hami maduma, sungkun ni hula-hula pinatangkas ma pinaboa,

Raja nami raja bolon;,

“ Diangka bulan bulan na salpu, borhat do anak nami mardalani tu huta ni datulang, tu huta… ….huta ni rajai. Dinasopanagaman pajumpang ibana dohot boru ni rajai,,,. Marnida hinauli ni rupa dohot uli ni pangalaho ni boru nirajai, laos did ok hatana tu boru ni rajai,,…..

las dialusi boru nirajai Huhut dihatahon,,

Ue silaklak ni antajau, sirege-rege ni ampang,

Ue  si anak ni amangboru, ibebere ni damang,

 Nasampang di au, aduadungku magodang,

           Molo saut ho diau, hita natau ripe sonang,

  Asal ma olo amang boru mambaen ulaon di pogu ni    alaman,    diantaran na bidang

Songonima alus ni boru ni rajai, paboa naung marpangoli, Tangkas mav naung udur hita sian bagas Joro ni Tuhanta, patupa pamasu-masuon pardongan saripeon ni anak dohot boru ni hula-hulai, marhite-hite naposona, Asa onpe rajanami;, sai rongkapna gabe ma boru ni rajai, rongkap matua. Sipalas rohani hami boru muna suang songoni humuna hula-hula. Hombar tu pangidoan ni rajai, laos ditingkion ma hami pasahathon sinamot, somba ni uhum somba ni adat, dipogu ni alaman ditongani si mangajana, ima sitangkas ni panggabean, sitangkas ni parhorasani  rajanami.

Botima !

RPB:   Gabe ma jala horas amang boru,,,!

“nungnga tangkas las rohanami, songon pangidoan munaido nang pangidoan nami, sai rongkapna gabe ma tutu rongkapna matua, sipalas roha ni amang boru suangoni hami Hula-hula, nuaeng pe diantaran na bidang on, ditonga ni simangajana, rohamu pasahathon sinamot nagok

Pat ni Gaja do inna tu pat ni hora,

Tanda ma hamu anak ni raja , pahompu ni namora

Nungnga pitu lili nami, pawaluhon jugian nami,

Nungnga uli nipinami, ai godang sinamot jaloon nami,

Botima,!!

RPA:   Gabe ma jala horas rajanami,,! “adat dohot uhum do nanidok ni rajai, tung sangap do hamu rajai dihami boru muna,  nasa tuk ni gogo nami bahenon nami do pasangaphon rajai. Ai tangkas do hubotohami rajai,  

Dang duhut-duhut ni dulang, alai duhut-duhut ni tolong,

                    Hula hula nami ,,,,,,(maraga) naso pala gulut di uang,  alai gulut di holong.

          Jadi nasatolap gogo nami rajanami, patupaon nami do laho pasangaphon hula-hulai.

          Botima,

RPB:   Gabe ma jala horas Amang boru,,

          Sar do inna barita , pur do alu-alu, dibarita hagabeon ni hamu amang boru, sian najolo sahat rodi nuaeng,” Barita ni lampedeng mardangkahon si bulung bira, barita ni hamoraon ni amang boru tarbarita rodi dia, suang songonido nang  hami raja ni hula-hula,………..

          Parjaha-jaha di bibir do hami, parpustaha di tolonan,

          Namalo maminta singir, ni tondi namasipaoloan, asa nuaneng pe amang boru ai nungnga marsipaoloan tondi ni boru nami, dohot anak muna , asa tangkas ma pasahat hamu amang boru;   - Horbo sabara

                   -Lombu sabara

                   -Hoda hundulan ni amanta raja,

                   -Mas saparangguan, suang songoni ringgit sitio suara,

          Botima Amang boru,

RPA:   Gabe majala horas rajanami,

“Molo didok rajai, molo didok rajai taringot barita hamoraon nami angka najoloi, dang huparsoada hami rajanami, suang songoni do angka barita ni datulang naburju marboru tarbarita do rodidia,

Barita ni bulung singkoru,mardangka sibulung bira,

batita diburju ni tatulang marboru, tarbarita do sahat rodi dia,

las on do nahupangaasahon hami,rajanami umbahen na huberanihon hami ro marsomba tu rajaai,. hombar tu pangidoan ni rajai …………(Margana),tangkas doi psauton nami alai molo siat pangidoan nami jala tumbuk tupangidoan ni rajai, ima Horbo,lombu,hoda dohot mas, Hurupiahon hami ma rajanami,jala molo siat pangidoan nami sahali mangkatahon ma hami jala sahali manambahon.

Botima,

RPB:   Gabe jala horas amang boru,

Taringot dipangidoan muna amang boru, pasahaton muna tuhami sinamont dohot ringgit sitio suara, jala sahali mangkatahon jala sahali manambahon, andoran so hugabehon hami amang boru , pangido hamu jolo panuturion sian dongan parhundul nami hula-hula muna. dohot gogo sian hamu namarhahamaranggi nang dohot noru/bere muna.

RPA:   Gabe ma jala horas rajanami,

“Onpe dihita namarhaha maranggi dohot boru, tarlumobi ma hamu raja ni hul-hula nami, Nungnga hutariashon hami Tu hulahula nami Raja ……….., sahali mangkatahon jala sahali manambahon sinamot nanaeng pasahaton tu nasida, alani pinagido majo gogo tuhamu boru nami, las dipangido muse gogo tu namarhaha maranggi, jala dipangido ma muse panuturion tu hula-hulana. ..(dung singkop sude)  dihatahon ma:

“Raja nami Raja……………,

Nungnga sisada urdot hami, sisada tortoran,

jala nungnga sisada unduk hami, jala sisada pandohan

asa pege sangkarimpang, tu assimun sada holbung

mangangkat rap tu ginjang, tu toru rap manimbung,

Pasahaton nami ma tu rajai sinamot sahali mangkatahon, las sahali manambahon.

Botima,

RPB:   Gabe jala horas amang boru,

“Nuaeng pe dihita namarhaha maranggi, boru nang dohot bere.! raja naginokkon tarlumobi raja ni hula-hula nami, dipangidoan ni borutta  naung sisada urdot sisada tortoran, naung sisada undukl jala sisada pandohan nasida , alani dipangido hami majolo alus sian hamu boru nami, dipasahat ma muse tu namarhaha maranggi, laos dipangido ma panuturion sian hula-hula. Didompakkon tu adopan ni hula-hula ;” Rajanami raja bolon, tangkas songon  na tinangi muna, pangkataion nami dohot raja ni boru nami, alai ditingkion pangidoan nami ma panuturion sian hamuna,

Molo manatap inna sian tuktuk, tarida ma tano palopo,

jumolo hami marsantabi tuhamuna hula-hula rajani nabisuk, jal rajani namalo,

 aut tung adong pangkataion nami namarjolo hupudi, songo labe-labe ni nahurang molotung humurang hami dihata, sotung unang mangkurangi diangka pangalaho, hita angka anak  ni raja jala pinompar ni namalo, asa tuturi hamu hami, rajanami diangka pangkataion nami, Botima rajanami,

Laos dipasahat ma Mic dohot panduan tu hula-hula jala dung simpul panuturion sian hula-hula, las diuduti ma muse hatana;”

Nuaeng pe amang boru nungnga hujalo hami  panuturion sian hula-hula nami, dohot boru nami taringot tu pangidoan muna amang boru sisahali manambahon nuaeng pe hu gabehon hami mai, hatahon amang boru ma!...

RPA:   Gabe majala horas Rajanami;

Mauliate malambok pusu ma hupasahat hami tuhamu saluhut uduran ni hula-hula nami, Jadi nuaeng pe rajanami pasahaton nami ma, sinamot tu rajai Godangna …….100.000.000 (saratus juta). Hamu hasuhuton nami borhat ma hita pasahathon sinamot tu hula-hulanta  jala andorang so dipasahat tu suhut parboru jumolo ma tu parsinabul asa dietong

Songoni mangihut muse ma tu angka suhi ni ampang na opat Dijouhon ma manurut urutanna sesui tu daftar panduan adapt. songon cotoh:

-       Paramang tuaon

-       paramang udaon

-       upa pariban

-       upa tulang

Dung masuk tu suhi ni ampang na 4 Simalohon, Alana simalohohon I tabodoi, jala godang sipata angka naposo dope nasida ( dang boi dope manjalo adat.

Dung sai sue dipasahat masuk ma tu ulaon na mangulosi

 (sesuai  Buku panduan )